CEBU, Philippines - Gimimakak sa hepe sa Regional Intelligence Division (RID) ang mga nanggawas nga report kalabutan sa gikataho nga duna’y membro sa teroristang grupong Al Qaeda ang ania karon sa Sugbo.
Sumala pa ni Superintendent Pablo Labra II ang hepe sa RID sa Police Regional Office (PRO) 7 nga negatibo ang ilang nakuha nga report gikan sa ilang counterparts sa intelligence community sa kapolisan ug sa Central Command.
Matud pa ni Labra nga aduna’y maayong relasyon ang kapulisan dinhi sa Sugbo ug sa Muslim Community nga maoy kaabag nila paghatag og impormasyon kung duna may mangabot nga terorista nga motisok og kagubot sa Kabisay-an ilabi na sa Sugbo.
Gipasabot sab ni Labra nga ang dakbayan sa Sugbo, giisip nga usa sa mga lugar nga hapsay puy-an sa mga Muslim tungod kay daghan na kanila ang namuyo dinhi ug dinhi na usab sila nanginabuhi ug ang ilang mga anak dinhi na nagtungha.
Kini nga mga rason paigo na aron dili itugot sa mga Muslim nga dunay mobuak sa kahapsay ug kalinaw dinhi sa Sugbo. Apan wala gipadaplin sa opisyal ang maong taho nga migawas sa usa ka lindog sa usa ka kolumnista nga mikutlo usab sa report sa usa ka online news site nga Rappler.com, ilaha na kini karong gisubay ug gi-monitor dinhi sa palibot sa dakbayan ug probinsya sa Sugbo.
Nasayran nga una nang migawas ang usa ka balita nga duna’y sakop sa Al Qaeda ang posibleng ania sa nasud nga si Musa Cerantonio, nga gikataho nga una nang nakita sa Manila, Cebu ug Zamboanga. -/EIM (BANAT NEWS)