CEBU, Philippines - Gipahigayun sa kapolisan sa Dakbayan sa Sugbo ang drug awareness seminar sa kabatan-onan human sa sunod-sunod nga pagkasikop sa mga drug pushers kinsa nakuhaan og daghang mga ilegal nga drugas. Unang gipahigayon ang kalihukan sa tunghaang sekondarya sa Barangay Tisa sa niaging adlaw.
Si Senior Supt. Noli Romana, direktor sa Cebu City Police Office, mipasabot nga kini kabahin sa ilang programa diin dili lang sa pagsikop sa mga nagbaligya og drugas apan sa pagpahinumdum usab sa kabatan-onan sa dautang epekto niini.
Usa sa tumong sa kapolisan ang mga nagtungha sa night high school nga maoy dali nga doulon ug matintal sa mga nagbaligya og drugas.
Si Chief Supt. Prudencio Tom Bañas, direktor sa Police Regional Office-7, mipasabot nga duna na sila’y giandam nga comprehensive plan alang sa mga tunghaan sa pagpasabot sa mga estudyante kabahin sa epekto sa drugas ug nganong gidili kini.
Una nang gipasalig ni Bañas atol sa iyang paglingkod nga usa ang isyu sa drugas ang iyang hatagan og pagtagad diin matud pa niya nga ang drugas ang hinungdan kung nganong duna’y mga krimen nga nanghitabo. (/GMR)(BANAT NEWS)