CEBU, Philippines - Ang mga karne sa iho nga nasakmit sa Task Force Kalikasan sa dakbayan sa Lapu-Lapu gidala sa buhatan sa Bureau of Fisheries and Aquatic Resources (BFAR-7) nahibaw-an nga iya diay sa “gummy shark.â€
Ang maong matang sa iho wala malakip sa lista sa Convention on International Trade in Endangered Species of Wild Fauna and Flora hinungdan nga mahimo kining iuli sa tag-iya.
Apan una kini buhaton, kinahanglan mopresentar ang driver sa gikargahang pickup og dokumento nga nagpakitang legal ang iyang pagdala niini sama sa permit to transport, auxiliary invoice ug business permit, kung wa niini dili na nila iuli pa ang maong mga karne sa iho.
Kahinumduman nga ang Task Force Kalikasan sa dakbayan sa Lapu-Lapu nakasakmit og mga frozen meat sa gummy shark sa miaging hapon diha sa Barangay Bangkal.
Nasayran nga ang maong mga frozen meat gipalit sa H.A Marine International sa Sitio Simporon, Suba-Basbas sa naasoy'ng siyudad nga giingong dad-on unta sa Barangay Pasil dakbayan sa Sugbo.
Matud ni Superintendent Virgil Ranes sa TFF nga nakadawat sila og report gikan sa usa ka concerned citizen nga adunay i-transport nga karne sa iho hinungdan nga ilaha kining gimonitor. Apan si Orlando Leyson ang tsirman sa City Fishery Aquatic Resource Management Council (CFARMC) sa dakbayan sa Lapu-Lapu nagduda nga posibleng may sagol nga karne sa butanding ang 1,650 ka kilong frozen shark meat nga ilang nakumpiskar.
Apan ang tag-iya sa H.A Marine International nga usa ka Australian nga si Hope A. Walker miklaro nang daan nga gummy shark ra gyud kini.(/EIM)(BANAT NEWS)