Talisay PNP may bag-ong mga radio

CEBU, Philippines - Ang Mayor sa dakbayan sa Talisay Johnny De los Reyes ug ang hepe sa kapolisan sa siyudad nga si Superintendent Reycel Carmelo Dayon mapasalamaton kaayo sa director sa Communications and Electronics Service sa Regional Communications and Electronics Office-7 nga si Chief Superintendent Rodel Calungsud sa mga hand held radio nga gihatag niini alang sa kapolisan sa siyudad.

Kagahapon 20 ka Motorola UHF/FM portable radio transceivers ang gitunol ni Calungsud ngadto kang De los Reyes alang sa mga polis ug sakop sa City of Talisay-Traffic Operation Development Authority (CT-TODA). Niadtong tuig 1998- 2000 si Calungsud kinsa usa usab ka Talisaynon naglingkod kini kaniadtong hepe sa kapolisan sa Talisay ug may kasinatian siyang kuwang gyud sa ekipo sa komunikasyon ang kapolisan sa Talisay.

Ang kapolisan sa dakbayan sa Talisay taud-taud na kining walay mga handheld radios nga magamit sa ilang operasyon tungod kay ang mga handheld radio nga gihatag kaniadto ni kanhi bise mayor Aberdovey Belleza nangaguba na.  Ang mayor nagplano nga pun-an pa niya ang maong mga radio ug mga patrolcar kung duna nay budget. (BANAT NEWS)