CEBU, Philippines - Pamilya sa negosyanteng si Richard King nga gipatay didto sa Davao City mihatag og P1 milyon nga reward money alang sa makahatag og impormasyon nga makasikop sa mamumuno ug sa mastermind sa maong pagpatay.
Samtang ang kapolisan sa Davao City mipagawas na sa computer generated sketch sa matud pa killer ni King.
Si Senior Superintendent Vicente Danao Jr., ang hepe sa Davao City Police Office (DCPO) nga nahinabi sa mga tigbalita kagahapong adlawa mibutyag nga nakig-alayon na kanila ang pamilya’ng King ug nipadayag nga ilang himuong usa ka milyon ka pesos ang reward money nga moabot na karon og P1.3 milyon tungod sa P300 mil nga gitagana ni Davao City Mayor Rodrigo Duterte. Matud pa ni Danao, nga dako kaayo kini og matabang sa daling kasulbaran sa maong kaso gumikan kay daghang mga tawo ang maengganyo paghatag og impormasyon.
Wala ‘sab gikompirma sa opisyal kung anaa pa sa dakbayan sa Davao ang gunman o nakasibat na ba kini sa ubang lugar. Matud pa niya, ang gunman maoy yawe ngadto sa mastermind. Daku ‘sab ang pagpasalamat ni Danao sa mga impormasyon nga naggikan sa dakbayan sa Sugbo nga nakatabang sa nakuha sab nila nga impormasyon. - /EIM (BANAT NEWS)