Asawa sa konsehal patay sa bangga sa motorsiklo

CEBU, Philippines - Patay ang asawa sa usa ka barangay konsehal samtang tulo ang naangol sa nahitabong panagbangga sa motorsiklo sa Sitio Cantipla, Barangay Tabunan, dakbayan sa Sugbo kagahapon.

Ang namatay naila nga si Joy Anne Rosaut, 39, samtang naangol ang iyang bana nga si Konsehal Oweb Rasaut sa Barangay Langub, Asturias ug ang ilang upat ka tuig nga anak nga si Kyle.

Nakaangkon usab og pangos sa kalawasan ug samad sa ulo si Cerilo Capol, 38, taga Sudlon II, dakbayan sa Sugbo nga nagmaneho sa laing motorsiklo nga gikabangga.

Matud ni SPO1 Porferio Lim sa City Traffic Division nga ang duha ka motorsiklo nagkasugat sa lisud nga bahin sa karsada hinungdan sa binanggaay.

Gumikan sa kusog nga impact, giingong nalabay ang asawa sa konsehal gikan sa ilang gisakyang motorsiklo ug nabunal sa aspaltadong dalan hinungdan sa iyang kamatayon.

Samtang usa ka ambulansiya sa dakbayan sa Talisay ang aksidenteng nabanggaan sa usa ka taxi kagahapon sa buntag sa eskina Tres de Abril ug Natalio Bacalso Avenue, dakbayan sa Sugbo.

Matud ni SPO1 Anthony Delijero sa City Traffic Operations Management (CITOM) nga wala kabantay ang drayber sa taxi nga si Edilberto Racas nga dunay naghaguros nga ambulansiya hinungdan nga iya kining nabanggaan.

Ang drayber sa ambulansiya nga si Edelberto Reyes wala na usab makapugong sa dagan sa pagtoo nga nabantayan sa matag sakyanan ang ilang paglabay.

Ang pasyente nga luwan sa ambulansiya nga si Mystica Parogalinog, 48, nga nag-antus sa pagpanakit sa tiyan ang nakaangkon og dugang bun-og sa kalawasan.

Nagkasabot ra hinoon ang duha ka partido ug wala na’y kaso nga ipasaka batok sa usa’g-usa. (BANAT NEWS)