CEBU, Philippines - Nasikop ang giilang pusher ug tulo ka manuyopay sa sitio Tugbongan, Pilipog, lungsod sa Cordova niadtong Huwebes sa hapon sa usa ka buy-bust operation.
Si PO3 Rovilo Librado sa Cordova Police Station miila sa mga nadakpan nga sila si Rovick Inting Sanchez, 27, taga Babag II, dakbayan sa Lapu-Lapu; Rogie Inting Sanchez, 20; Michael Paypa Escoto, 22 ug John Mark Lapid Sucano, 22, nga taga Barangay Pilipog.
Matud ni Librado nga si Senior Insp. Alexander Nuñez, hepe sa kapolisan sa nahisgutang lungsod ang nangulo sa pagpahigayun sa buy-bust operation nga miresulta sa pagkasikop sa mga suspetsado.
Nasakmit ang lima ka paketeng shabu, lima ka tin foil, mga plastic nga may lama sa shabu, P600 nga nakuha gikan kang Rovick nga gituohang halin ug P200 nga marked money nga gigamit sa ilang police decoy sa pagpalit og shabu.
Matud ni Librado human sa pipila ka adlaw nga pagpaniid ilang nasuta nga positibo ang taho nga ilang nadawat hinungdan nga gihimo ang operasyon.
Nunot sa pagkasikop ni Rovick nga maoy tumong sa buy- bust, ilang naabtan ang tulo ka mga kauban nga nagsuyop maoy hinungdan nga lakip kini sa ilang gidakop ug gibalhug sa detention cell. (BANAT NEWS)