Taga Warwick nangayo og lugway

CEBU, Philippines - Nag-rally gawas sa Cebu City Hall ang mokabat 30 ka residente sa Warwick Barracks, Barangay Ermita kagahapon sa buntag.

Gihangyo sa grupo ang paghatag og lugway sa pagbalhin kanila sa Barangay Budlaan diin ilang gihulagway nga layo ug lisud tungod kay walay tubig ug kuryente ang maong lugar.

Pasado alas 9 sa buntag nagsugod ang rally ug pasado alas 4 na sa hapon namahawa human usa sa ilang grupo nakaestorya ang pangulo sa Division for the Welfare of the Urban Poor (DWUP) nga si Atty. Collin Rosell.

Matud sa usa sa mga niuban sa rally nga si Vifina Paulo, 56, adunay tulo ka anak, nga lisud ang pagbalhin sa Barangay Budlaan tungod kay nag-eskwela ang iyang mga anak sa syudad. Apan si Rosell mipasabot nga dili mahitabong wala’y tubig ug kuryente sa lugar sanglit may mga namuyo na niini.

Matud ni Rosell nga pasangil lang sa mga residente kay gusto kining makabalik og paninda sa Warwick nga kasamtangang gihimong parking lot.

Gipasalig ni Rosell nga libre ang paghatud ug paghakot sa mga butang sa mga residente sa Warwick Barracks paingon sa Budlaan. (BANAT NEWS)