CEBU, Philippines - Giandam na sa kapolisan sa Bohol Provincial Police Office ug Bien Unido, Bohol ang mga kaso batok sa upat ka mga kauban sa unom ka mga napatay sa shootout nga naglakip sa kanhi polis nga si Owen Rosales.
Ang mga mitahan giila nga sila si Orlando Garcia, usa ka 17-anyos, Paulo Avenido ug Robert Olalo, kinsa pulos nangangkong igo ra silang giimbitar ni Rosales nga kuyogan sila sa maong resort.
Si Senior Insp. Teodil Torregosa, hepe sa Bien Unido Police mitug-an sa Banat News nga napasakaan na kagahapon og kasong illegal possession of firearms and explosives ug illegal possesion of illegal drugs ang upat. Ipaubos pa sa ballistics examination ang mga armas nga nakuha sa crime scene kun motakdo ba kini sa gigamit pag-ambush kang Chief Inspector George Caña diha sa Talibon.
Usa sa mga nakalas sa nahitabong shootout tali sa kapulisan ug grupo ni Rosales mao si Amy Camero. Si Camero lumad nga taga Kimba, barangay Cansojong dakbayan sa Talisay nga usa sa kuyog ni Rosales sa Aplaya Beach Resort sa barangay Puerto San Pedro diin nahitabo ang engkwentro.
Ang pamilya niini sa Talisay nga nahinabi sa Banat News miingon nga nananghid kini nga moadto sa lalawigan sa Bohol.
Apan wa sila masayod kinsa ang iyang adtoon sa Bohol ug kinsay kuyog niini. Ang amahan niini nga si Peter Camero mibutyag nga iyang silingan na ang nakasulti sa gidangatan sa iyang anak didto sa Bohol.
Nanawagan sila og tabang nga unta madala ang patay'ng lawas niini balik dinhi sa Sugbo aron kahatagan og maayong haya ug lubong. Gikasagmuyo sa pamilyang Camero kun nganong giapil sa pagpusil si Amy nga wa man kini labot sa gihimo sa iyang gikuyogan. (/EIM)(BANAT NEWS)