CEBU, Philippines - Usa ka motorsiklo ang giilog sa armadong tawo kagahapon sa kaadlawon human sa piyesta sa lungsod sa Liloan.
Si Fiel Alegato, 26, ulitawo ug nagtrabaho isip katabang sa usa ka dakung tindahan sa lungsod miasoy nga samtang nagsakay siya sa iyang motorsiklo sa barangay Poblacion, kalit lang siya gitionan og armas sa wala mailhing lalaki ug mipakanaug kaniya sa iyang motorsiklo.
Mipuli pagsakay ang lalaki dayun pabulhot og dagan paingon sa amihanan.
Nadawat sa kapolisan ang alarma hinungdan nga daling gigukod ang lalaking nagsakay sa motorsiklo apan wala gyud maapsi hangtud sa dakbayan sa Danao.
Si PO3 Jesson Gayo nagtoo nga miliko paingon sa bukirang bahin hinungdan nga wala na kini nila igkita sa kadalanan dihang ilang gisundan.
Bisan sa maong insidente, si Gayo mihulagway nga malinawon ang tinuig nga pangilin sa lungsod sa Liloan ug wala’y dagkung panghitabo nga natala gumikan usab sa ilang hugot nga pagbantay. (Romeo T. Limpangog/GMR)
Kasong murder batok tanod gipasaka na
Gipasaka na ang kasong murder batok sa barangay tanod sa Poblacion, Cordova kinsa giingong nipusil patay sa iyang pag-umangkon nga adik.
Ang akusado nga si Jose Minguito alyas King gitumbok nga nipusil patay sa pag-umangkon nga si Daniel Minguito, 28, ug nipaslak pa og usa ka paketeng shabu ug tinfoil sa baba niini.
Si PO3 Vilma Degamo, imbestigador sa kapolisan sa maong lungsod nga nahinabi sa Banat News miingon nga ang text message nga gipadala sa biktima ngadto sa kapuyo niini sa wala pa mahitabo ang pagpatay maoy usa sa nahimo nilang ebidensiya sa kaso nga ilang gipasaka batok sa suspetsado.
Pipila usab sa mga nakasaksi ang nakakita sa suspetsado nga nagbarugbarug sa dapit nga napalgan ang patay’ng lawas sa biktima nga maoy hinungdan sa pagtumaw sa ilang katahap sa krimen nga nahimo.
Ang biktima giingong nakahigayun pa sa pagpadala og text message ngadto kang Marjorie Alingasa nga iyang kapuyo ug nagpahibalo daan nga kun mamatay siya niadtong gabhiona si Manoy King ang nagpatay kaniya.
Dihang gisusi sa kapolisan ang maong pangalan nga gihisgutan sa biktima sa text message, nasuta nga ang uyoan nga si Minguito nga Manoy King ang tawag sa namatay ngadto kaniya hinungdan nga ilang gisikop. (/GMR)(BANAT NEWS)