CEBU, Philippines - Kapulisan sa dakbayan sa Sugbo mikompirmar nga gawas sa pag-joy ride nanulis gyud ang tulo ka lalaking nangilog og mga sakyanan niadtong Domingo sa gabii.
Gimandoan ni Mayor Michael Rama ang kapolisan paglihok ug pangitaon ang mga gikatahapan.
Si Police Chief Inspector Noli Cernio ang hepe sa Theft and Robbery Section sa Cebu City Police Office mikompirmar nga gitulis ang drayber ug tag-iya sa SUV nga naka-parking sa Ayala Heights nga si Eleanor Rivera nga suod nga higala sa mayor. Sa imbestigasyon sa kapulisan TRS, nakuha sa tulo ka mga lalaki ang 50 mil ka pesos gikan ni Rivera, mga importanteng ID’s, yawe sa balay ug mga credit cards ug mga gadgets nga naa sa sud sa sports utility vehicle niini nga gidala sa mga gikatahapan sa Barangay Babag.
Nasagmuyo ang kapulisan sa ilang pagsubay sa gasoline station sa Barangay Pook, Talisay City diin unang nangilog sa taksi ni Elineto Catalia ang tulo, apan guba ang CCTV. (BANAT NEWS)