CEBU, Philippines - Ang Commission on Higher Education (CHED)-VII mao nay modumala karon sa kontrobersiyal Talisay City College (TCC) human wa maresolbar ang kasungian sa duha ka naglingkod nga “acting presidents†niini diha sa korte.
Ang TCC-Board of Trustees mipaluyo ni Ritchel Bacaltos samtang si Dr. Paulus Mariae Cañete usab maoy gusto ni Mayor Johnny De los Reyes pinasikad sa iyang executive order hinungdan sa kaguliyang.
Apan sa usa ka close-door board meeting sa CHED office sa Lahug, Cebu City, ang tanang sakop sa BOT nakadesider nga mahusay lang ang kagubot kun ang CHED na maoy modumala niini. Si CHED regional director Freddie Bernal mao na karo’y officer-in-charge TCC. Ang meeting kagahapon gi-preside mismo ni De los Reyes kinsa maoy tsirman sa onse ka sakop sa board nga gilangkoban sa mayor isip chairman; college president isip vice-chairman; Cebu first district Representative Gerald Anthony Gullas isip honorary member, Talisay City District Superintendent Woodrow Denuyo isip board secretary.
Ug ingon man ang uban pang tsirman sa nagkadaiyang komitiba. Ang mga representante lang sa Cebu Normal University (CNU) ug Cebu Technological University ang wala motambong kagahapon. Si Bacaltos kinsa diha sa maong meeting miuyon sa desisyon aron di magkaproblema ang mga tinun-an. Si De los Reyes miingon nga iyang i-revoke ang gipagawas niining executive order pagtudlo kang Cañete isip officer-in-charge sa TCC. (Edwin Ian Melecio gikan sa The Freeman/EIM)