Kapitolyo andam na mopresentar sa rehab plan

CEBU, Philippines - Andam na ang Kapitolyo nga mopresentar sa rehabilitation and recovery plan sa nagusbat sa bagyong Yolanda sa amihanang bahin sa lalawigan sa Sugbo atol sa tigum karong Biyernes.

Ang Task Force Paglig-on ang gitahasan ni Gob. Hilario Davide III nga mopresentar sa plano ngadto ni Presidential Assistant for Rehabilitation and Recovery Sec. Panfilo Lacson.

Ang tigum himoon karong Mayo 30 sa Waterfront Cebu City Hotel and Casino.

Matud ni Davide nga wala pa matino kung kinsa nga mga sakop sa gabinete ni Presidente Benigno Aquino III ang motambong.

Apan gipahibawo siya sa sinaligan ni Lacson nga motambong sila si DSWD Sec. Corazon “Dinky” Soliman, Budget Sec. Florencio Abad ug DPWH Sec. Rogelio Singson.

Si Bise Presidente Jejomar Binay nga pangulo sa Housing and Urban Development Coordinating Board (HUDCC) ang gikatakda usab nga motambong.  (/GMR)(BANAT NEWS)