CEBU, Philippines - Naningil na ang Department of Environment and Natural Resources ngadto sa Department of Public Works and Highways kun hain na ang gipangtanom nila nga kahoy bugti niadto’ng mga giputol nila nga punoan sa mangga sa Mambaling.
Ang dako’ng punoan sa mangga gipaputol sa kadagkoan sa DPWH kay naigo kini sa road widening project sa Natalio Bacalso Avenue ug dalan C. Padilla kilid sa Mambaling fly over.
Gipadad-an og suwat ni DENR-7 Regional Executive Director Isabelo Montejo si DPWH-7 Regional Director Ador Canlas ug gipahinumdoman nga adunay pagtugot ni DENR Undersecretary Demetrio Ignacio Jr. ang pagputol sa mga kahoy kaniadtong Nobyembre 21, 2013.
Lain pa nga mga punoan sa kahoy’ng Narra ang gipang-ibot diha’ng gipahigayon ang proyekto.
Apan giklaro ni Montejo nga gikinahanglan nga tumanon sa DPWH ang kondisyon bugti sa pagtugot sa pagputol sa usa ka punoan sa mangga nga mao ang pagtanom og 100 ka bag-ong punoan sa kahoy.
Gipangayoan usab ni Montejo si Canlas og hulagway sa mga kahoy’ng Narra nga ilang giibot ug kun asa kini gitanom pagbalik. (BANAT NEWS)