CEBU, Philippines - Duha ka tawo namatay ug duha usab ang naangol sa managlahi’ng aksidente sa kadalanan didto sa lungsod sa Ginatilan ug dakbayan sa Danao kaniadtong Biyernes sa gabii. Ang namatay sa aksidente didto sa Ginatilan mao si Ryan Baylan, 32, taga Sitio Bungtod, Barangay San Roque. Si Baylan, usa ka seaman, maoy nagmaneho sa motor ug miangkas kaniya si Eric Tugbong, 22.
Nabangga sila sa usa ka semento nga bahin daplin sa karsada nga nakapatay ni Baylan tungod sa daghang bun-og. Matud pa nga nakainom ang mga biktima.
Sa Danao, si Wilfredo Pontemayor, 38, drayber ug taga Poblacion, Catmon nadasmagan og Isuzu Canter nga gimaneho og kapitan sa barangay samtang nagsakay’g motor ang biktima sa national highway sa Barangay Dungo-an.
Naapil sa pagkaangol ang drayber og traysikad nga si Trinidad Matugas. Si Barangay Kapitan Luis Manulat sa Triunfo, Carmen mitahan sa mayor sa Carmen. (BANAT NEWS)