CEBU, Philippines - Nag-unang suliran sa T.Padilla Public Market, dakbayan sa Sugbo ang parkingan gawas sa merkado ug ang kahugaw mugna sa junk shop sa tupad nga bahin. Si Irene Zaida del Prado, officer-in-charge sa T. Padilla Public Market, nagkanayon nga gihimong extension ug grahian sa sakyanan sa junkshop ang parkingan gawas sa merkado.
Gihatagan ni del Prado ang establisemento og usa ka buwan sa pagkuha sa ilang sakyanan sa parkingan apan wala gihapon kini panumbalinga.
Matud niya nga kung dili mopatoo ang tag-iya, mapugos siya paghangyo sa City Traffic Operations Management (CITOM) ug ipa-clamp ang mga sakyanan.
Ang mga mangomprahay sa merkado giingong dili na maka parking sa gitagana nga parkingan gumikan kay gigamit kini sa mga sakyanan sa junkshop.
Matud ni del Prado nga nakamugna usab og kahugaw ang tinulo nga asete sa sakyanan.
Sakit sa buot ni del Prado ang kahugawan sa ubang tawo sanglit ilang tinguha nga limpyo kanunay ang merkado alang sa mga mamalitay.
Samtang nangreklamo ang mga tindera sulod sa maong merkado gumikan sa pagpabarato sa presyo sa mga naninda sa gawas nga bahin nga ilang kompetensiya apan wala mag-abang. (BANAT NEWS)