CEBU, Philippines - Usa ka Hapon ang patay ug laing siyam ang angol, lakip ang walo niini ka mga kauban sa dihang nadisgrasya ang ilang gisakyang van sa national highway sa Barangay Gawi, Oslob kagahapon sa hapon.
Ang mga biktima paingon unta sa Barangay Tan-awan aron mag-whale watching sa dihang nahitabo ang maong aksidente tungod sa mechanical problem.
Ang mga biktima daling gidala sa Oslob District Hospital dayon sa South General Hospital sa dakbayan sa Naga apan wala gyud kaabot pa si Hiromi Ichimura kinsa namatay pag-abot pa lang sa lungsod sa Dalaguete.
Ang ubang mga biktima gidala sa Cebu Doctor’s University Hospital. Ang drayber sa Toyota Hi-Ace van nga nagdala og plakang NCI-206 nga si Guillermo Hella, 57, wa magrabehi ug natanggong karon sa karsel sa Oslob.
Matud ni Insp. Christopher Castro, hepe sa Oslob Police Station, nga gikan pa sa dakbayan sa Sugbo ang mga biktima ug pipila na lang unta ka kilometro sa Barangay Tan-awan sa dihang nawad-a’g kontrol sa manobela si Hella ug nasampak sa punoan sa Mahogany sa daplin sa dalan.
Si Ichimura naglingkod sa luyo ni Hella ug maayong pagkaipit sa nadarok niyang mga kaubanan tungod sa kakusog sa impact. (BANAT NEWS)