CEBU, Philippines - Ang pagtinabangay sa gobiyerno ug pribadong sektor maoy labing maayong sulbad sa suliran sa informal settlers ilabi na sa siyudad.
Kini ang pamahayag ni Soomsook Boonyabancha, secretary-general sa Asian Coalition for Housing Rights nga nahimong bisita sa dakbayan sa Mandaue.
Matud pa niya nga dili lang masulbad sa gobiyerno ang suliran sa kakulang sa kapuy-an sa mga urban poor pinaagi sa pagmugna og mga proyekto kun walay pag-abag ang pribadong sektor ug komunidad.
Gikuyogan si Boonyabancha sa mga opisyal sa Social Housing Finance Corporation (SHFC) isip kabahin sa ilang kampanya sa pagpalapad pa sa citywide development approach alang sa pagsulbad sa informal settlements sa nasud.
Gitataw ni Boonyabancha nga ang mga dakbayan sa Mandaue ug Iloilo maoy nagsilbi nilang modelo alang sa uban pa nga mga dakbayan nga nagtinguha usab sa pagmugna og programa alang sa pagsulbad sa informal settlers.
Kini ang hinungdan nga nagtinguha usab sila nga masundog ang gihimong pamaagi sa duha ka lokal nga kagamhanan pinaagi sa pagpadala usab og mga representante sa walo pa ka siyudad ug mga lider sa urban poor. Kini naglangkub sa dakbayan sa Parañaque, Quezon, Valenzuela, Marikina, Muntinlupa, Davao ug uban pa. (BANAT NEWS)