CEBU, Philippines - Nasikop sa kapolisan ug sa mga sakop sa Department of Agriculture (DA) ang 16 ka mananagat nga migamit og zipper ug trawl sa ilang pagpangisda didto sa kadagatan sa Bantayan nga gidili sa maong lugar.
Ang balaod nagdili sa paggamit og mga commercial nga mata’ng sa pagpangisda diha sa kadagatan 15 kilometros gikan sa kabaybayonan.Ang nadakpan kagahapon sa buntag mao sila si Vicente Destura, 49, kapitan sa F/B Balder; Jonnel Fernandez, 27; Jesus Desamparado, 43; Fernado Gido, 38; Jonatan Gilbuela, 34; Jomar Villanace, nga pulos taga Bantayan.
Nasikop sab sila si Roger Aguilar, 31; Ricky Amayna, 27; Ronaldo Luyao, 27; Ramil Aguilar, 21; Romcel Mandalupe, 19, Ryan Layoso, 28; Rogelio Nedar, 32; nga mga taga Dakbayan sa Cadiz sa Negros Occidental.
Nasikop sab sila si Rene Pospie, 46 ang kapitan sa F/B Aki; ug duha ka sakop nga sila si Raymond Canindo, 28, ug Kikil Colio.
Ang operasyon gipahigayon nila ni PO1 Jay Desucatan, PO1 Jimmy Luyao, ug sa mga taga Municipal Agriculture Office sa lungsod sa Bantayan.
Nasakmit sa kapolisan ug sa taga MAO ang F/B Balder nga may pukot nga pino og mata, unom ka banyera nga isda nga mokabat og P6 mil.
Samtang nakompiskar sab ang F/B Aki nga aduna gihapo’y pino og mata nga pukot, ug tulo ka banyera nga isda nga mobalor og P3 mil. Ang mga nasikop nga mananagat gitanggong karon sa bilanggoan sa lungsod sa Bantayan. (BANAT NEWS)