CEBU, Philippines - Moabot kapin sa P155 milyones ang pondo nga gitagana sa mga mining companies alang sa pagtubag sa nag-unang panginahanglanon sa mga komunidad diin nahimutang ang minahan.
Gibutyag ni Mines and Geosciences Bureau-7 Regional Director Loreto Alburo nga 334 porsiyento ang gidak-on sa gahin nga gitagana sa mga mining companies sa Central Visayas alang sa nagkadaiyang social development and management programs (SDMP). Mas daku kini kaysa P46.415 milyones sa nakalabay nga tuig.
Matud ni Alburo nga ang Sugbo ang may labing dakong gahin sa kantidad nga P147.102 milyones, Bohol P7.573 milyones, Negros Oriental P250 mil ug Siquijor P149 mil. Sa Sugbo, nag-una sa nigahin og dakong pondo alang sa SDMP ang Carmen Copper Corporation sa dakbayan sa Toledo sa kantidad nga P127.969 milyones.
Gimando ni DENR Secretary Ramon JP Paje ang paghatag og kasegurohan nga ang tanang komunidad makapahimulos gyud sa makiangayon nga pahat gikan sa kita sa mga mining contractors pinaagi sa pagpatuman og mga livelihood ug ubang susamang mga programa. (BANAT NEWS)