Anak sa gidakop nga wanted atol sa iyang kasal na-traumatized

CEBU, Philippines - Gihulagway nga dili makatarunganon ang gibuhat sa Argao Police pagdakop sa usa ka most wanted sa ilang lungsod, sulod sa simbahan human sa kasal niini.

Mao kini ang pamahayag ni Hazel Villamater, bayaw sa dinakpan nga si Angelito Tanaid nga gidakop sa simbahan sa lungsod sa Ronda niadtong nakalabay nga adlaw.

Matud pa ni Villamater nga nahinabi sa mga tig- balita nga mas maayo unta og paggawas na sa suspetsado gihimo sa kapulisan ang pagsikop niini aron dili sab mabalda ang maong kasal.

“Dapat sa paggawas na lang unta sa simbahan gihimo, dili unta sa sulod, kay kabalo man siya nga naa siya’y warrant,” matud pa ni Villamater.

Si Villamater mibutyag nga nakasaksi pa gyud ang anak sa magtiayon nga nalisang sa gibuhat sa mga polis ngadto sa ilang amahan.

Apan si Police Inspector Alejandro Batobalonos ang hepe sa Argao Police Station kinsa maoy nangulo sa pagdakop sa suspetsado miingon nga wala silay nakitang sayop sa ilang gihimo.

“Asa man mi dapit dili makatarunganon nga amoa na lang gani sila nga gipahuman, kapila na mi misulay og dakop ana niya makaikyas gyud. Ang ako pangutana sa ilaha kung naa ba’y nakabutang sa warrant nga dili siya pwede dakpon sa simbahan,”  matud pa sa hepe.

Andam hinoon ang opisyal kung moreklamo man ang mga kabanay sa ilang gidakop nga most wanted sa Argao kinsa nag-atubang og upat ka mga kasong frustrated murders. (/EIM)(BANAT NEWS)