CEBU, Philippines - Wala na’y madawat nga insentibo ang Department of Education Toledo City Division kalabot sa ipatuman nga Brigada Eskwela sunod semana sa mga pampublikong tunghaan.
Si DepEd Toledo City division superintendent, Dr. Ronald Gutay, miasoy nga wala mogahin ang Local School Board og pondo alang sa Brigada Eskwela 2014.
Kini sukwahi sa nakalabay nga katuigan diin nabatasan na sa DepEd nga mohatag og insentibo sa kantidad nga P10 mil ngadto sa P12 mil sa mga pangpublikong tunghaan sa dakbayan.
Subay niini nipadayag si Gutay nga modawat sila og hinabang gikan sa ubang lokal nga kagamhanan ug pribadong kompanya apan dili sila modawat og tabang pinansyal.
Magsugod ang Brigada Eskwela 2014 sa Mayo 19 hangtod na sa Mayo 24.
Ang tinuig nga programa sa DepEd mao ang pag-ayo ug pagpanglimpyo sa mga pangpublikong tunghaan isip pagpangandam sa pagbukas sa klase.
Gikatakda nga mobukas ang klase karong Hunyo 2. (BANAT NEWS)