CEBU, Philippines - Giulo pagpusil sa pag-umangkon ang iyang uyoan sa Sitio Saac, Barangay Buaya, dakbayan sa Lapu-Lapu sa milabay’ng gabii. Ang biktima mao si Wilmar Abing Pontanosa, 34, minyo, nagpuyo sa maong lugar ug usa ka stonemason worker. Sa pasiunang imbestigasyon ni PO3 Winston Ybañez nasuta nga samtang natulog ang minor de edad nga pag-umangkon, nakamata kini gumikan sa panaglalis sa iyang mga uyoan nga si Wilmar ug Rolando Matedios tungod sa motorsiklong gigamit nga wala mananghid. Sa dihang miuwang ang pag-umangkon, siya na hinoon ang gikasab-an ni Wilmar hinungdan nga milanit siya og pistola dayung pusil ngadto sa uyoan.
Daling gidala sa tambalanan si Pontanosa human kini maigo sa iyang walang bahin sa ulo samtang misibat usab ang pag-umangkon. Hinoon luwas na sa makuyaw nga kahimtang si Pontanosa samtang padayon pang gipangita ang iyang pag-umangkon nga nakapusil. (BANAT NEWS)