CEBU, Philippines - Blangko pa ang kapulisan sa Homicide Section sa pag-ila sa pagkatawo sa usa ka babaye nga nakit-ang patay, ala-una sa kaadlawon kagahapon didto sa Sitio Maaslom, Barangay Busay ning dakbayan sa Sugbo.
Sa inisyal nga imbestigasyon sa Homicide Section, usa ka nag-roving nga tanod sa maong barangay sakay sa iyang motorsiklo nga si Bienvinido Noval maoy nakadiskubre sa biktima.
Matud pa nga nahibulong si Noval sa nakit-ang nidagayday paubos nga dugo daplin sa karsada ug sa iyang pagsubay niini, nakit-an niya ang patay’ng lawas sa usa ka babaye hinungdan nga mitawag dayon siya sa kapolisan.
Si SPO4 Alex Dacua, imbestigador sa Homicide Section sa Cebu City Police Office miingon nga wala sila’y nakuha nga bisan usa ka identification card o bisan unsang dokumento nga magpaila sa biktima.
Kini adunay gitas-on nga 5’2, nakasuot og gray nga t-shirt, nagsuot og pantalon nga kolor blue, naka tsinelas, aduna’y tattoo nga dragon sa likod ug blonde ang buhok.
Sa paghiling sa lawas niini, duna kini usa ka samad nga gituohang pinulisan sa likod sa iyang ulo.
Usa ka basiyo sa bala nga gituohang .9mm nga pistola ang nakuha diha sa crime scene.
Sumala pa sa barangay tanod nga nahinabi sa kapulisan nga wala sab siya nakadungog og buto sa armas didto sa maong lugar sa wala pa niya nakita ang maong patay nga lawas.
Sa pagkakaron blangko pa ang kapulisan sa pangalan, motibo ug kung taga asa ang biktima, gumikan hasta ang taga Barangay Busay walay nakaila sa maong patay nga lawas. (BANAT NEWS)