CEBU, Philippines - Ang mga drayber og traysikad sa dakbayan sa Toledo giawhag sa kapolisan nga ilang ipabag-o ang permit to operate nga giisyu kanila.
Si SPO4 Allan Barquin, pangulo sa traffic division sa Toledo City Police, miawhag sa mga tag-iya ug drayber sa mga traysikad nga ang pagbag-o nila og permit gitumong aron dili sila madakpan.
Kinahanglan pa hinuon nga sila mobayad og P400 sa matag unit sa traysikad aron sila kahatagan og permit. Dugang ni Barquin nga kadto’ng mo-renew sa ilang permit adto sila mobayad sa City Treasurer’s Office aron mahatagan sila og resibo.
Nasayran nga adunay dili momenos 600 ka traysikad ang nag-operate sa dakbayan sa Toledo.
Ang traysikad gihimo na nga alternatibo nga transportasyon sa mga lumolupyo sa dakbayan kay kini mas barato sa plete nga tag P5 kun itandi sa traysikol nga tag P8 ang plete.
Ang mga opisyal sa Toledo wala pa modili sa mga traysikad pagsulod sa downtown area sa dakbayan kay dili pa kaayo problema ang trapiko sa ilang siyudad. (BANAT NEWS)