Huwes wa motugot nga ipakita ang mga testigos sa Archival ambush

CEBU, Philippines - Gimandoan sa korte ang duha ka kampo sa pagsumitir og memoranda uban sa ilang mga legal nga argument kalabot sa gisang-at nga motion to quash search warrant nga gisang-at  sa Highway Patrol Group (HPG)-7 officials nga suspek sa pag-ambush kang Atty. Noel Archival ug kauban niini. Wa mahinayon ang hearing kagahapon sa maong mosyon apan bisan paman niini gipasumitir sila og memoranda sud sa napulo ka adlaw.

Matud ni Atty. Renan Oliva sa National Bureau of Investigation (NBI)-7 nga gusto unta sa kampo nila ni RHPU-7 chief, Senior Superintendent Romualdo Iglesia, Senior Inspector Joselito Lerion, Chief Inspector Eduardo Mara, SPO4 Edwin Galan ug PO1 Alex Bacani pinaagi sa ilang legal counsel, Atty. Inocencio dela Cerna nga ipresentar ang mga witnesses sa pag- apply sa search warrant apan di mosugot si Executive Judge Soliver Peras sa Regional Trial Court kay gusto niyang sa trial proper na kini himuon.

Kahinumduman nga gustong ipabasura sa opisyales sa Highway Patrol Group (HPG)-7 ang bili sa search warrant. Matud ni Atty. Inocencio dela Cerna nga walay igong basihan ang pagpagawas sa search warrant  batok sa iyang mga kliyente.

Samtang, si NBI Regional Director Atty. Max Salvador miingon nga atol sa case conference uban sa Philippine National Police, wala sila hatagi og kopya sa tulo ka carthographic sketches nga giingong responsable sa ambush.

“Walang naibigay sa amin na cartographic sketches…walang ipinakitang ganun,” matud niya.

Kahinumduman nga gipresenta ni dela Cerna sa media ang tulo ka cartographic sketches nga ilang nakuha sa Special Investigation Task Group (SITG), kinsa unang niresponde sa kaso.

Iyang gikwestyon kun nganong wala kini malakip sa attachment sa ebidensya sa NBI ug nganong ang iyang mga kliyente man maoy giduot nga inosente man sila sa alegasyon. (BANAT NEWS)