Nobyembre 4 gideklarar nga ‘day of mourning’

CEBU, Philippines —  Gideklara ni Presidente Ferdinand R. Marcos Jr. ang Nov. 4, 2024 isip "Day of National Mourning",  agi'g paghinumdom sa mga kinabuhi nga nakalas tungod sa kadaot nga dala sa Bagyong Kristine nga adunay internasyonal nga pangalan nga Trami.

Pinaagi sa proklamasyon, ang presidente niingon nga kini agi'g pakighiusa sa mga namatyan nga pamilya ug mga minahal sa kinabuhi sa mga nangamatay tungod sa kadaot nga dala sa bagyo.

Giawhag usab niya ang tibuok nasud nga maghalad og pag-ampo alang sa mga nawad-an sa ilang kinabuhi tungod sa trahedya.

Subay sa Republic Act (RA) 8941 ug nunot sa pag-isyu sa Proclamation 728, sa Lunes, ang national flag kinahanglang naka-half-mast sa tanang mga edipisyo ug instalasyon sa gobyerno sa tibuok nasud ug sa gawas sa nasud sa pagsubang sa adlaw hangtud sa pagsalop.

Sumala sa RA 8491 o ang "Flag and Heraldic Code of the Philippines", ang Bandera sa Pilipinas kinahanglan nga naka-half-mast sa tanang mga edipisyo ug mga dapit diin kini gi-display, isip timaan sa pagbangotan sa panahon sa mga trahedya nga adunay nasudnong kahulogan, subay sa mando sa Office of the President.

Kahinumdoman nga gikan niadtong Oktubre 21 hangtud 25, 2024 ang bagyong Kristine nagdala og kusog nga pagbunok sa ulan ug kusog nga hapak sa hangin nga maoy hinungdan sa grabeng pagbaha ug pagdahili sa yuta. Dugang niana, grabe usab ang pagkaguba sa mga kabtangan, lakip ang dako nga kadaot sa agrikultura ug kritikal nga mga imprastraktura ug lifelines, ingon man ang pagkabalda sa mga panginabuhian ug ang normal nga kinabuhi sa mga tawo, labi na sa mga apektadong lugar.

Base sa report sa National Disaster Risk Reduction and Management Council (NDRRMC) sa Oktubre 30, 2024, 1,788,630 na ka mga pamilya o 7,033,022 ka mga indibidwal ang naapektuhan sa bagyong Kristine ug 139 ka mga kaswalti.