CEBU, Philippines - Nagtinguha si acting Dumanjug Mayor Efren Guntrano Gica nga mopasaka og laing kiha batok sa suspendidong mayor, Nelson Garcia, sa hunta probinsiyal sa Sugbo.
Kini human giingong adunay kahiwian ang mga transaksiyon ni Garcia sama sa pagtukod sa Megadome sa lungsod.
Duha ka dokumento ang nakita ni Gica nga wala magkatakdo ang detalye niini nga posibling may kahiwian.
Nipasangil si Gica nga ang engineer nga nagdala sa proyekto dili lisensiyado ug nigamit lang pangalan sa usa ka Lab General Engineering.
Si Garcia sa iyang bahin andam motubag sa mga pasangil ni Gica.
Nagtoo si Garcia nga makapasuspenso si Gica sa iya pag-usab aron magpabilin siyang kasamtangang mayor sa paagi nga walay eleksiyon sanglit dili gyud modaug ang bise mayor kung sila ang mag-atbang sa piniliay.
Samtang dili na moluwat si Gob. Hilario Davide III og mga komentaryo labot sa iyang pagpatuman sa suspension order batok kang Garcia.
Ang hunta probinsiyal ang padayun karong nag-imbestigar sa kasong administratiba nga unang gipasaka ni Gica labot sa pagtudlo og sangguniang bayan secretary.
Giklaro ni Davide nga iya nang gibuhat ang iyang trabaho nga pagtuman sa suspension order ug pagbasura sa motion for reconsideration ni Garcia. (BANAT NEWS)