CEBU, Philippines - Supak ang mga residente ug mga sektor sa Sugbo sa 12 porsiyento nga usbaw sa water rate nga giduso sa Metropolitan Cebu Water District (MCWD).
Kagahapon sa gipahigayon nga public hearing sa City Hall, dunay di mominos siyam ka mga representante sa katilingban ang nipadayag sa ilang pagsupak sa maong umento.
Apan ang mga representate sa MCWD nagkanayon nga walo ka tuig na usab nga wa sila mag-increase ug ang maong increase gikinahanglan nila para sa pag-expand sa ilang serbisyo sa ubang barangay ilabina sa mga bukirang dapit diin lisod sak-on sa tubig. Si Ernie Delco, ang Assistant General Manager for operations sa MCWD nagkanayon nga sa pagkakaron, 43 porsiyento o 160,000 ka mga balay ang ilang giserbisyohan, apan mahimo na kining 76 porsiyento ang coverage kung ma-implementar ang maong usbaw.
“We ask the public to understand that we need to have a water tariff in order to survive,†dugang pa ni Delco. Siya nagkanayon nga ang MCWD wala makadawat og financial support gikan sa gobyerno nga unta, government owned and controlled corporation unta sila.
Ang pangulo sa usa ka asosasyon sa mga residente sa Barangay Apas wala mouyon niini kay matud pa, daghan na gani ang naputlan karon sa P13.6 per cubic meter nga rate sa MCWD, unsa pa kaha kung mahimo na kining P15.
“Kung maghunahuna mo og development, increase dayon sa presyo unya ang mga gamay ang maapektohan. Gamay ra mi nga minimum wage earners intawon. Ayaw mi himoa nga sacrificial lamb sa inyong mga plano,†matud pa sa presidente sa Apas.
Ang presidente usab sa Cebu Uniting for Sustainable Water Foundation nga si Roberto Ybañez ang nangutana kung wala na ba gyud diay laing alternatibo ang MCWD para ma-adress ang problema niini. (BANAT NEWS)