CEBU, Philippines - Imbes pampabugnaw, kainit dalang kasuko ang nabati sa usa ka kahera nga nabiktima sa mini nga kwarta nga gibayad sa halo-halo sa gibantayang tindahan diha sa barangay Poblacion dakbayan sa Toledo.
Si Josie Batoon, kahera sa Golddas Foodshoppe ang nabiktima sa mini nga P1000 bill nga gibayad sa usa ka hamtong nga babaye nga mikaon og halo-halo nga balor og P30 diin iya usab nga gisuklian.
Nasayod na lang si Batoon nga mini ang maong salapi human nga nireklamo ang kolektor sa lending nga iyang gibayran sa iyang datahan nga P750.
Igo na lang sa pagpanghupaw ang kahera kinsa nailad sa P1000 bill.
Una niini daan nang nipahimangno ang kapulisan sa dakbayan sa Toledo nga magbantay sa mga nikatap nga mga peke nga kwarta. (/EIM)(BANAT NEWS)