CEBU, Philippines - Nagkinahanglan og dugang magtutudlo ang Department of Education Toledo City Division alang sa academic school year 2014-2015. Si City Division Superintendent Dr. Ronald Gutay mibutyag nga dugang 50 ka magtutudlo ang ila gikinahanglan.
Kini gumikan sa gipaabot usab nga pagsaka sa gidaghanon sa mga tinun-an sa pagbukas sa klase.
Ang DepEd Toledo City Division nipahigayun na og interview sa mga aplikante ug naghuwat na lang sa resulta sa ranking sa mga kwalipikadong mga aplikante.
Una nang gihimug-atan sa maong opisyal nga adunay pagtaas sa mga enrollees sa 2014-2015 ilabi na sa ikatulo ka tuig na nga pagpatuman sa K to 12 program sa Department of Education.
Hinoon gipa-ngandaman na usab kini sa pagtukod og dugang lawak-saringan sa mga tunghaan sama sa hapit na mahuman nga katukuran sa duha ka andana nga may napulo ka lawak sa Luray National High School.
Adunay pito ka mga barangay sa Toledo nga tukuran usab og dugang high school diin gihuwat na lang ang budget nga tag P4.7 million nga gikan sa nasudnong kagamhanan. (BANAT NEWS)