CEBU, Philippines - Patay ang usa ka 30 anyos nga lalaki human dasmagi sa naghaguros nga motorsiklo sa Barangay Arpili, Balamban sa niaging gabii.
Ang biktima nailhan nga si Manoling Baculi, taga Barangay Olango, Aloguinsan ug usa ka construction worker.
Naangol usab ang mga sakay sa motorsiklo nga sila si Edward Sacayan, 19, ug ang angkas niini nga si Joemarie Caldoza, 18, pulos taga Barangay Buanoy, Balamban.
Base sa imbestigasyon sa kapolisan, giingong kalit nga nitabok sa dalan ang biktima. Tungod sa kakusog sa impact, nalagpot sa dalan ang tulo ug daling gidala sa Balamban Provincial Hospital. Si Caldoza gidala sa tambalanan sa dakbayan sa Sugbo samtang si Sacayan gibalhog sa prisohan ug gikatakdang pasakaan og kaso. Samtang kritikal ang kahimtang sa drayber sa usa ka Suzuki multicab human aksidenteng nabanggaan sa Mitsubishi Adventure niadtong Miyerkules sa gabii sa dalan N. Bacalso, Lawaan I, dakbayan sa Talisay.
Ang drayber sa multicab nga may plakang GRX-344 mao si Niño Sanoy, 30, taga Deca Homes, Tungkil, Minglanilla.
Ang inahan nga si Alma Sanoy, 47, ug kaubang pasahero luwan sa multicab nga si Mila Aller, 43, nakaangkon og grabeng kadaot sa lawas.
Ang drayber sa Mitsubishi Adventure nga nagtangag sa plakang YKG-979 giila nga si Aldrin Olaco Pieras, 34, taga Mountain View Village, Barangay Quiot, Pardo, dakbayan sa Sugbo. Sa imbestigasyon ni SPO1 Cecelio Miñoza sa Talisay City Traffic Division nasuta nga ang duha ka nahisgutang sakyanan paingon sa managlahing direksiyon.
Ang multicab padulong sa lungsod sa Minglanilla samtang ang Adventure padulong sa dakbayan sa Sugbo.
Giingong si Pieras nagduka nga nagmaneho sa sakyanan ug nakatulog hinungdan nga nibangga ngadto sa atubangang bahin sa multicab.
Matud ni Miñoza nga maayong pagkagusbat sa nawong sa multicab ug napiit si Niño ug gibana-banang sulod sa 20 minutos pa kini naugkat human gitabas sa sakop sa Talisay City Fire Station ang habig diin mapiit ang biktima. (BANAT NEWS)