Productivity benefits sa mga hotel ug restaurant workers giduso sa DOLE-7

CEBU, Philippines - Gikatakdang pakigtagboan sa kadagkuan sa Department of Labor and Employment (DOLE-7) ang mga nanag-iya og hotels ug restaurants dinhi  sa Sugbo ug sa Central Visayas aron pagpasabot kanila sa pagpatuman sa productivity o performance base benefits ngadto sa ilang mga kawani.

Kini tungod kay nakita nga milambo og maayo ang industriya sa turismo ilabi na karong panahon sa ting-init ug tingbakasyon.

Si DOLE-7 Regional Director Chona Mantilla mitug-an nga ang paghatag og productivity o performance base benefits mas makaayo sa mga kugihang mga empleyado ug sa negosyante usab.

Kini tungod kay napanglantawan nga mas maningkamot ang mga kawani sa paghimo sa ilang trabaho tungod kay may madawat silang dugang benepisyo gawas sa makuha nila nga sweldo.

Si Mantilla nagkanayon usab nga mas maayo pa kining pamaagi sa paghatag og benepisyo sa mga kawani kay sa gipangayo karon nga usbaw sa suholan sa labor sector.

Gani iyang gipahibawo nga pipila na ka mga transport operators ang nagpatuman na niini nga gikalipay sa mga drivers tungod kay mas dako na man sila’g makobra nga insentibo gawas sa ilang sweldo. Subay niini, si Mantilla miingon nga mas maayo usab kining ipatuman ngadto sa mga kawani sa mga hotels ug restaurants ilabi na nga daghan na kini karon og mga kliyente.

Matud pa ni Mantilla nga ang meeting sa kadagkuan sa DOLE-7 ug sa mga negosyante sa hotels ug restaurants gikatakdang ipahigayon sa ikaduhang semana sa bulan sa Mayo ning tuiga. (BANAT NEWS)