CEBU, Philippines - Kritikal ang usa ka babaye nga gilabnihan sa iyang shoulder bag nga gipusil sa armadong snatcher nga nagsakay og motorsiklo ala 1 pasado kagahapon sa hapon didto sa Gochoco Compound, Sitio Liong, Barangay Alang-Alang, dakbayan sa Mandaue.
Ang biktima mao si Ma. Teresa Ouano, 48, nagpuyo sa Alang-Alang ug ang nagpusil kaniya mao ang wala hiilhing lalaki nga nag-angkas sa motorsiklo nga mao usab ang naglabni sa iyang shoulder bag. Si PO2 Melvin Candido sa Mandaue City Police Office (MCPO) miingon nga gikan pa sa ilang panimalay ang biktima ug sa paggawas sa compound kalit lang kining gisakdapan sa motorsiklo nga gisakyan sa duha ka snatchers ug gilabni ang gisambilay nga bag. Matud ni PO2 Candido nga wala dayon mabuhii sa biktima ang shoulder bag nga maoy hinungdan nga gipusil kini sa nag-angkas nga lalaki sa wala pa matino nga kalibre sa armas. Dugang ni PO2 Candido nga ang biktima naigo sa iyang nawong ug nahagba kini sa karsada.
Ang biktima dali nga gidala sa usa ka pribadong tambalanan sa dakbayan sa Sugbo ug padayon pa nga giatiman sa mga doktor. (BANAT NEWS)