CEBU, Philippines - Mga konsehal sa dakbayan sa Sugbo supak gayud nga kanselahon ang public hearing kabahin sa tinguha sa Metro Cebu Water District (MCWD) nga pausbawan ang ilang prisyo sa tubig.
Ang MCWD pinaagi ni General Manager Armando Paredes miawhag unta sa mga konsehal sa dakbayan nga dili na idayon ang public hearing nga gitakda unta karong Mayo 7. Apan si Konsehal Alvin Dizon miingon nga angay’ng paminawon gayud ang sentimento sa mga konsumidor sa tubig kabahin sa laraw nga ang prisyo sa matag kubiko sa tubig pausbawan og dul-an sa duha ka peso. Nauyonan sa mga konsehal sa dakbayan kagahapon nga padad-an og laing imbitasyon ang kadagkoan sa MCWD. (Rene U. Borromeo)
Babaye gisakdapan sa snatcher nga de-motor
Babaye nga nag-atang og kasakyan gisakdapan lang sa duha ka tawo nga nagsakay’g motor ug ang nag-angkas daw kilat nga milabni sa iyang bag didto sa Barangay Canduman, dakbayan sa Mandaue kaniadtong Martes sa gabii. Si Czarina Mabelle Abello, 26, dalaga nga taga Phase 2, Sitio San Miguel, Barangay Jagobiao, dakbayan sa Mandaue masulob-on nga mireport sa hitabo ngadto sa Presento 6 sa Mandaue City Police Office.
Nagpaabot unta si Abello og habal-habal nga iyang masakyan paingon sa Talamban diha’ng snatchers nga nag-motor maoy misakdap kaniya ug malampuson nga mikuha sa iyang bag. Ang bag sa biktima adunay sulod nga kapin sa dos mil pesos. (BANAT NEWS)