CEBU, Philippines - Tulo ka regular nga kawani sa Talisay City Hall ang giingong nagpositibo sa drug test nga gipahigayon niadtong Lunes.
Si Talisay City Administrator John Yre De los Reyes nga nahinabi sa mga tigbalita mibutyag nga duna silay nadawat nga report nga giingong dunay mga kawani sa city hall nga drug users hinungdan nga mipahigayon sila og drug test. Matud ni De los Reyes nga ang nahisgutang mga nagpositibo suspensuhon dayon aron magpaubos sa drug rehabilitation.
Gibutyag niini nga sayo niining tuiga, ang mga job order gipaubos usab sa random drug test diin dunay mga JO ang nangataktak sa trabaho human mapositibo.
Dunay 32 ka mga kawani sa Civil Security Unit (CSU), Human Resource Department, City Admin, City Planning and Development Coordinator (CPDC) ang napaubos sa drug test niadtong Lunes diin tulo kanila ang giingong positibo.
Nunot niini, si De los Reyes miingon nga dunay lawom nga imbestigasyon nga himuon kalabot sa lain pang kawani sa city hall nga nanghatag og tambal ngadto sa ubang mga kawani nga gipaubos sa drug test.
Sumala pa nga ang maong tambal giingong makatabang nga ma-negatibo ang resulta sa drug test bisan og naggamit kini og ginadiling drugas. (BANAT NEWS)