Ayaw kahadloki ang Lumad Basakanon — Mayor Rama

CEBU, Philippines - Gitataw ni Mayor Michael Rama nga bisan og grand champion ang Lumad Basakanon sa pagsalmot nila sa Aliwan Festival mahimo gihapon kini nga moapil sa Sinulog Grand Parade sunod tuig.

Katin-awan kini nga giluwatan ni Mayor Rama tungod kay adunay nanglantaw nga mora’g dili na makiangayon kun moapil lang gihapon ang Lumad Basakanon sa Sinulog kay dako ang posibilidad nga sila gihapon maoy makadaug.

Matud ni Rama nga dili angay’ng huna-hunaon sa mga contingents nga mapilde ra sila sa pag-apil sa Sinulog Grand Parade kun anaa ang Lumad Basakanon.

“Dili na ma-exclude ang Lumad Basakanon. Ang ilang pagkadaog cannot be a basis for exemption. They should continue performing. Naa man usab mangapil sa Sinulog nga mga maayo and it is a challenge sa ubang contingents,”  ni Rama pa.

Usa ka milyon ka pesos ug tropeyo ang nahakot sa Lumad Basakanon pagpauli nila human ilang gipilde ang mga banggiitang contingents gikan sa lainlaing mga festivals sa nasud.

Gidayeg usab sa mayor ang pagdaog ni Steffi Aberasturi nga Aliwan Queen ug ang Tribu Lumad Basakanon gideklarar pa gayud nga Best in Costume, Musicality. (BANAT NEWS)

Show comments