CEBU, Philippines - Bisan sud sa bangko, mga kawatan way kukahadlok mamiktima. Kini human usa ka ginang ang gilipat ug gikawatan sa iyang bag sud sa usa ka dako nga bangko sa Tabunok sa dakbayan sa Talisay kagahapon sa buntag.
Midangop sa kapulisan ang usa ka Amor Lazaga, 30, Bacayan, ning dakbayan sa Sugbo human nga gikawat iyang bag sulod mismo sa maong bangko.
Sumala pa ni PO1 Janel Segura nga nahinabi sa Banat News, kawani sa usa ka insurance firm ang biktima nga konektado sa maong bangko ug duna kini giatimang kliyente nianang tungora dihang gikawat iyang bag sa duol nga lamesa nga adunay sulod nga duha ka atm cards, usa ka credit card ug mga importanteng mga IDs.
Sa pagsusi sa biktima sa bangko sa iyang ATM card, matud pa naka-withdraw ang kawatan og P4,000 sa iyang account tungod kay naa man sa sud sa bag ang pin code niini.
Sa pagsubay sa CCTV sa maong bangko, nakita ang duha ka mga kawatan nga usa ka babaye ug lalaki nga milipat sa biktima dayon og kuha sa bag niini.
Wala makabantay ang tulo ka mga guard on duty atol sa maong panghitabo bisan duha lang sila ka metros sa gikahimutangan sa bag. Nagpadayon pa ang pag-follow up sa Theft and Robbery Section sa kapulisan sa syudad sa Talisay aron pagtumbok sa mga suspetsado. (BANAT NEWS)