Kanhi mensaherong mi-shift sa drug pushing nadakpan

CEBU, Philippines - Arestado ang usa ka kanhi bank messenger nga gipasanginlang level one drug pusher human kini nadakpan sa gihimong buy-bust operation sa City Anti-Illegal Drugs Special Operations Task Group (CAIDSOTG) sa Cebu City Police Office diha sa barangay Pulangbato.

Giila ang dinakpan nga si Sotero Lorete, 31, nagpuyo ra usab sa maong lugar kinsa matud pa sa kapolisan,  mensahero sa bangko kaniadto apan mi-shift og panginabuhian ug namaligya na og shabu.

Usa ka sakop sa CAIDSOTG ang nagpakaaron-ingnong mopalit kaniya og balor P2,000 nga shabu. Atol sa pagkasikop kaniya na-recover usab sa kapulisan ang daku nga putos sa gituohang shabu nga mokantidad og P200 mil.

Sumala pa sa hepe sa CAIDSOTG nga si Sr. Insp. Eunil Avergonzalo nga duha ka semana nilang gipaubos sa surveillance ang maong suspek.

Si Lorete matud pa, makabaligya og 200 gramos nga shabu matag semana. Gipaubos sa surveillance si Lorete human sa pagkasikop sa iyang mga kauban nga sila si Rolando Migabon ug usa ka Lito Lopez.

Apan si Lorete mibutyag nga duha pa lang siya ka bulan nga namaligya og shabu. Temporaryo karong gibalhog sa bilanggoan sa Camp Sotero Cabahug ang suspetsado nga mag-atubang og kasong paglapas sa Section 5 ug Section 11 sa RA 9165.  (Jojo Ugdol/EIM)

Tulo ka Papuans nga  nag-maoy gipadakop

Tulo ka tinun-ang langyaw gikan sa Papua New Guinea ang nadakpan human kini ireklamo nga nagmaoy kagahapon sa kaadlawon diha sa Barbeque Boss, Sto. Niño Village, Barangay Banilad ning dakbayan sa Sugbo.

Ang mga suspek giila nga sila si Andrew Ungia Kembo, 26 ; Elizah Norman, 23 ug Pilol Manzawe Kumang, 23, mga tinun-an sa usa ka unibersidad ning dakbayan sa Sugbo.

Matud pa ni Police Investigator Riolito Jacalan, ang mga suspek nag-inom sa nahisgutang lugar. Si Kembo, nga usa sa mga suspek giingon nga nagpakita sa iyang kinatawo sa kahera ug gipanglabay pa niini ang mga lamesa ug bangko.

Ang mga kustomer nga nabastos ug gisamokan mikulata kanila ug gibunalan sila og botelya ug gipadakop sa mga polis. Ang management sa Barbeque Boss wala mopasaka og kaso batok ni Norman ug Kumang apan gi-ban na sila sa maong establisamento.

Samtang si Kembo kasohan og malicious mischief tungod sa nangagubang mga gamit sa maong establisamento. (BANAT NEWS)