CEBU, Philippines - Walo ka paltik nga armas ug mga bala ang na-recover sa gipahigayong pagpangronda sa Regional Criminal Investigation and Detection Group (RCIDG)-7 ug kapolisan sa dakbayan sa Danao niadtong Lunes sa hapon didto sa Barangay Taytay.
Si Senior Superintendent Richie Posadas, hepe sa RCIDG, mibutyag nga nakadawat sila og report kabahin sa giingong ilegal nga operasyon sa pagpamuhat og paltik nga armas ni Renerio Lucero, 45-anyos, residente sa nahisgutang dapit.
Ang kapolisan daling miresponde sa maong report ug pag-abot nila sa lugar giingong ila g’yud nga nakita si Lucero nga nag-assemble og mga armas.
Na-recover sa mga polis gikan sa shop ni Lucero ang unom ka 45 kalibre nga pistola, duha ka kalibre .38 nga revolver, walo ka .45 kalibre nga magazine, 50 ka bala sa kalibre 45, usa ka grinding machine ug uban pang gamit alang sa pagbuhat og mga armas.
Si Lucero pasakaan og kaso’ng illegal manufacturing of firearms. (BANAT NEWS)