CEBU, Philippines - Usa ka tawo nga nagpasalba sa iyang armas nakaangol og duha niya ka silingan didto sa Sitio Bukid-bukid, Barangay Pajac, dakbayan sa Lapu-Lapu kaniadtong Sabado sa hapon.
Ang mga biktima mao sila si Richie, 16, ug Tyron Igot Ompad, 20, nagpuyo gihapon sa Sitio Bukid-bukid. Ang giingon nga nakaangol kanila mao ang ilang silingan nga si Jaylou Ramos, 31.
Sa imbestigasyon ni SPO1 Allan Pantaleon nasayran nga nagkalalis ang inahan ug iyaan ni Ramos ug aron sila mahilom mikuha siya og armas dayong gawas sa ilang panimalay ug gipabuto.
Matud pa nga gitumong sa yuta pagpabuto ni Ramos ang armas apan ang bala mibanda ug didto mipunta sa tuo nga paa ni Richie ug milahos pa g’yud ang bala sa tuo nga paa ni Ompad.
Gidala sa tambalanan ang duha ka biktima ug luwas na hinuon sila sa makuyaw nga kahimtang.
Matud sa kapolisan nga si Ramos dali nga misibat dihang giadto sa kapolisan. (BANAT NEWS)