CEBU, Philippines - Nadakpan sa kapolisan ang duha ka suspetsado’ng drug pusher samtang nakaikyas ang usa nila ka kauban sa gipahigayon nga buy-bust operation didto sa Barangay Tayud, Consolacion kagahapon sa kaadlawon.
Si PO1 Socrates Borinaga, sakop sa Consolacion Police Station, miila sa nadakpan nga sila si Reynan Lauron, 27, ug Allan Auman, 28, nga pulos nagpuyo sa Sitio Binabag nga sakop sa Tayud.
Nasayran nga ang usa ka pakete nga shabu nga paliton unta sa poseur buyer wala pa matunol mao nga nadala kini sa pagdagan sa ikatulo nga suspetsado nga si Danilo Lato.
Si PO1 Borinaga miingon nga si Allan Auman mao gayud ang tumong nga palitan og illegal nga drugas sa mga sakop ni Senior Inspector Franco Rodolfh Oriol kay mao man kini ang gikasabot sa poseur buyer.
Dihang gihatag na ngadto ni Auman ang marked money, si Lato nga kuyog ni Auman mao unta ang mitunol og shabu.
Sa pagduol na sa mga polis aron dakpon ang mga pushers maoy unang nakakita si Lato ug mao nga nakahigayon kini pagdagan pahilayo ug wala na maabti sa paggunit sa mga polis.
Si Lauron ug Auman nga nakalitan sa kalit nga pag-abot sa mga polis wala dayon makalihok mao nga sila nadakpan.
Matud ni PO1 Borinaga nga si Lauron nakuhaan og usa ka pakete nga shabu ug kahimanan alang sa paggamit niini samtang si Auman nasakmitan usab og duha ka pakete’ng shabu. (BANAT NEWS)