CEBU, Philippines - Maayong pagkalungag sa tuong mata sa usa ka 28- anyos nga lalaki nga drayber sa usa ka delivery truck human gipusil sa wala ilhing tawo nga sakay sa motorsiklo sa barangay Magdugo dakbayan sa Toledo.
Giila ang biktima nga si Junrel Pantonial del Monte residente sa barangay Poog sa dakbayan sa Toledo.
Base sa imbestigasyon sa kapulisan nga gipangulohan ni Police Chief Inspector Michael Anthony Bastes, hepe sa Toledo City Police Station naghuwat sa laing duha ka kauban nga naghatod og stocks sa usa ka mini mart sa barangay Magdugo ang biktima.
Ug samtang nagpaabot, miinom kini og softdrinks daplin sa gimanehong trak dihang kalit nga mibutho ang mga gikatahapan nga nagtaptap og t-shirts sa nawong ug gipusil sa nag-angkas ang biktima.
Daling misibat ang mga suspek sakay sa Haojue nga motorsiklo nga kolor pula nga walay plate number. Gidala sa Toledo City Hospital ang biktima apan gibalhin sa South General Hospital sa Naga City. (/EIM)(BANAT NEWS)