CEBU, Philippines - Tun-an sa Police Regional Office 7 ang posibilidad sa pagtukod og usa ka task force sa Metro Cebu nga susama sa Metro Manila Development Authority (MMDA) agi og tubag sa hagit ni Mayor Michael Rama.
Si Sr. Supt. Edward Carranza, PRO-7 chief of directorial staff, miingon nga tun-an nila kun mahimo ba nga kahatagan og katumanan ang awhag sa mayor.
Matud ni Carranza nga mas dali na lang unya ang kooperasyon sa mga unit commanders sa kapolisan sa Metro Cebu kun duna nay magkupot kanila.
Kaniadto sa wala pa ang Philippine National Police (PNP) mamugna, duna na’y Cebu Metrodiscom nga ang teritoryo gikan sa Naga sa south ngadto sa Carmen sa north.
Ang tumong sa pagmugna og Metro Cebu PNP gitumong aron mamenosan og katunga ang mga krimen sa Metro Cebu tungod kay ila na kining gi-set alang sa pagahimoon nga Asia Pacific Economic Cooperation (APEC) Summit nga ipahigayon sa Sugbo sunod tuig.
Matud ni Carranza nga si Sr. Supt. Ronald Capa, deputy regional director for operations ang mohimo sa maong plano nga isugyot ni Chief. Supt. Danilo Constantino, ang hepe sa PRO7. (BANAT NEWS)