CEBU, Philippines - Nadakpan sa kapolisan ang gikatahapan nga “gunrunner†kon tigpayuhot og armas human kini mibaligya og mga armas didto sa Barangay Tabok, dakbayan sa Mandaue kaniadtong Miyerkules sa buntag.
Si Joseph Penas, 38, minyo nga nagpuyo sa Barangay Tabok nasakmitan og duha ka kalibre 45 nga pistola nga pulos adunay magazine, ug usa ka X9 Shooter’s Caliber 9 mm machine pistol nga adunay duha ka magazine.
Si Superintendent Fermin Armendarez miingon nga nakadawat na sila og mga taho labot sa nagpadayon nga pagpamaligya og armas sa nahisgutang dapit nga gipasiugdahan sa usa ka tawo nga nailhan lang nila sa pangalan nga Joseph.
Kini ang hinungdan nga gihimoan nila og pakisusi ug nagpatuo ang mga polis nga mopalit sila’g armas pinaagi ni SPO2 Roel Leyson nga wala magpaila nga polis.
Sila si Armendarez ug mga kaubang polis nagpaatbang lang luwan sa tinted nga sakyanan ug gidakop si Penas dihang nahuman na ang pinalitay sa armas. (BANAT NEWS)