CEBU, Philippines - Nadakpan sa mga sakop sa intelligence section sa Cebu City Police Office (CCPO) ang usa ka tawo nga naghupot og kalibre 45 nga pistola samtang nagpatrolya ang kapolisan sa Barangay Suba kaniadtong Martes.
Si Daniel Ongcoy, 29, wala makapakita og lisensya sa iyang armas nga adunay pito ka bala mao nga nakalapas siya sa Comprehensive Law on Firearms and Ammunitions.
Samtang ang mga sakop sa Criminal Investigation Branch (CIB) nakasakmit usab og unom ka video karera ug “moli-moli†machines nga gi-operate sa lainlaing dapit sa Barangay Suba.
Nakasigpat ang mga sakop sa CIB nga dunay tulo ka moli-moli ug tulo usab ka video karera nga giduwaan sa usa ka payag-payag.
Wa hinuo’y nanug-an kun kinsa ang nagbantay ug tag-iya sa maong mga illegal gambling machines.
Ang video karera ug moli-moli gipahugtan sa paghimo’g kampanya sa kapolisan atol nga si Chief Superintendent Marcelo Garbo mao pa ang regional direktor sa kapolisan sa Central Visayas.
Ang Banat News nakadawat og daghang report gikan sa mga molupyo sa lainlaing barangay nga namalik na karon ang video karera. (BANAT NEWS)