CEBU, Philippines - Gustong ipabasura sa Highway Patrol Group (HPG)-7 ang search warrant nga miresulta sa pagka-rekober sa usa ka sakyanan nga gidudahang usa sa gigamit sa mga killers ni Atty. Noel Archival ug duha ka mga kauban sa barangay Corro, Dalaguete niadtong Pebrero.
Matud ni Atty. Inocencio dela Cerna walay igong basihan ang pag-isyu sa search warrant batok sa iyang mga kliyente.
Sila si HPG-7 chief, Senior Superintendent Romualdo Iglesia, Senior Inspectors Eduardo Mara, Joselito Lerion ug SPO4 Edwin Galan.
Mi-file kagahapon og motion to quash search warrant sa Regional Trial Court Branch 10 ang kampo sa HPG-7 tungod niini. Gawas pa niini, si dela Cerna nagkanayon nga wala sila makadawat og kopya sa dokumentong gigamit isip suporta sa pag-apply sa maong search warrant. Matud niya nga giimbestigar dayon iyang mga kliyente nga wa pay klarong ebidensya. Gawas kang Archival, nakalas usab sa maong ambush sila si Candido Miñoza ug Alejandro Jayme ug nasamdan usab si Paulo Cortez.
Matud ni Dela Cerna nga katungod sa iyang kliyente nga matagaan og kopya sa mga dokumento sa pag-apply sa search warrant.
Ang upat matud niya padayun nga nagtrabaho ug andam nga ipa-ballistics examinations ilang armas ingon man pagpailawom sa lie detector test arun ipamatuod nga wala silay kalambigitan sa maong krimen.
Si NBI Regional director Max Salvador nagdumili una pagkomento sa maong mosyon hangtud nga wala kini makabasa niini. (BANAT NEWS)