CEBU, Philippines - Kanunay g’yud nga mabalda ang pag-agi sa mga sakyanan diha sa dalan B. Rodriguez tungod sa mga tawo nga anha na molakaw sa karsada kay ang aseras gigamit na sa mga sidewalk vendors.
Ang mao nga mga tindera gisilotan na ni City Administrator Lucille Mercado duha ka buwan ang nakalabay pinaagi sa pagsirado sa ilang mga tindahan bali’g tulo ka adlaw.
Ang hinungdan mao nga gigamit nila ang aseras sa ilang pagpaninda ug ang katawhan mapugos na sa paglakaw sa karsada nga nakahatag usab og kapilegro kanila nga madam-agan sa mga sakyanan.
Mga motorista nagbagulbol tungod kay kagahapon sa udto ang mga tawo nga naglakaw miukopar na sa daku’ng bahin sa karsada mao nga nakasinati og problema sa trapiko atubangan sa tindahan sa mga sidewalk vendors.
Gawas sa mga tindahan nga anaa sa aseras, aduna pay uban nga mga ambulant vendors nga anaa sa karsada mamaligya sa ilang produkto sama sa pagluto og bibingka nga gigamitan og karomata.
Gihangyo sa mga motorista ang kadagkoan sa Cebu City Hall nga ila unta nga hapsayon ang mao nga dapit sa dalan B. Rodriguez. Gisusi sa Banat Manobela kagahapon sa hapon, misamot ang kasamok sa karsada. (BANAT NEWS)