CEBU, Philippines - Walay plano ang kadagkoan sa Traffic Enforcement Agency of Mandaue (TEAM) nga mohimo’g rerouting sa mga sakyanan bisan sa nagpadayon nga road repair sa mga national road nga nagtadlas sa dakbayan.
Matud ni Edwin Ermac, ang operations chief sa TEAM, nga gilauman lang niya nga unta ang pag-ayo sa mga karsada mahuman sa dili pa ang Mayo 8 nga maoy pista sa Mandaue.
Nagtoo si Ermac nga makasinati g’yud og problema sa trapiko kun ang pag-ayo sa Ouano Avenue sa Mandaue dili pa mahuman sa pista.
Nasinati na nga mata’g pista sa Mandaue daghang sakyanan ang mosulod sa dakbayan nga gikan sa silingan nga mga dapit.
Walay laing mahimo ang TEAM gawas sa pagdistino og daghang mga sakop sa mga karsada nga wala pa mahuman pag-ayo aron maminus-minus ang problema sa trapiko.
Samtang wala pa usab ipahigayon ang pag-ayo sa flyover diha sa Mandaue kay nakapanglantaw ang TEAM nga makapasamot kini sa problema sa trapiko kun himoon kini karong higayona.
Mga walo ka karsada sa Mandaue ang gipangsemento sa DPWH ug nakamugna kini og kahuot sa mga sakyanan. (BANAT NEWS)