CEBU, Philippines - Ang kagamhanan sa dakbayan sa Talisay nagplano nga mopalit kini og daghang ambulansya aron apuran ang 22 ka barangay sa siyudad nga magamit sa dali nga pagresponde sa mga emerhensya.
Tumong ni Mayor Johnny V. De los Reyes nga dunay magamit dayon ang kabarangayan kun dunay pasyente sa barangay nga kinahanglang ihatud ngadto sa tambalanan.
Ang Barangay Poblacion ug Camp 4 maoy unang nahatagan og mga ambulansiya dili pa lang dugay.
Nabantayan kagahapon nga diha sa atubangan sa barangay hall ang Suzuki van nga ambulansiya nagparada.
Gipasalig sa mayor nga tanang barangay sa siyudad anam-anamon niya paghatag og ambulansiya.
Kahinumduman nga daghan na ang mireklamo tungod kay ang mga sakop sa Talisay Rescue Emergency Assistance Team (TREAT) usahay mobalibad kun dunay pasyente nga magpahatud sa tambalanan.
Matud ni Talisay City Public Information Officer (PIO) Vincie Monterde nga ang TREAT duna la’y duha ka ambulansiya apan ang usa nadisgrasya ug padayon pang gipaayo. Si Monterde miingon nga gawas sa mga ambulansiya, ang kagamhanan sa Talisay nagplano usab pagpamalit og dump trucks aron magamit sa kabarangayan sa paghakut sa mga basura.
Wala hinoon maklaro kun may igo ba nga kwarta ang Talisay nga gamiton sa pagpamalit sa daghang ambulansya ug dump trucks. (BANAT NEWS)